اليوم السبت كان فيه اختبار الكفاءة اللغوية لمعلمات المدارس (العين + بوظبي).
الاختبار بشكل عام يقيس كفاءة معلماتنا في اللغة العربية سواءً في الكتابة او الاستماع او الفهم والاستيعاب (القراءة)
وكنت انا مراقبة في احد القاعات...
طبعا واقفه على ريولي من ثمان الصبح لين ست المسا... ريولي ماقمت احس بها من الويع لكن الله كريم
هي تجربة يديده واحس اني استفدت منها...
كنا نراقب صباحيا على معلمات مدارس العين ومن بعد الظهر على معلمات مدارس ابوظبي
صراحة فعلا تشوف فئات وشخصيات متباينة ومختلفه تماما في قاعة الامتحان
منها المحترم جدا منها الهادي منها الدفش اللي ماعنده اسلوب ومنها اللي يحب يتاكد على كل سؤال يزقر المراقب.. ومنها يشل الدنيا ومب ناوي يقعدها...
فعلا تحتاج لطولة بال كبييييييييييييييييرة عشان تتعامل مع كل هالتباين فالشخصيات... خصوصا يوم يستوي موقف وتطلع فيه كانك مسئول عن مشكلة ولازم تحلها....
لاحظت على زميلاتي المراقبات ان اغلبهن يتنرفزن ويبدون حرب الكلام الطاحنه بينهن وبين المدرسات... بحجة انهن مجرد مراقبات ومب هن حاطات الامتحان ومايخصهن....
الطرفين عنده حق بالعصبية....
لكن المفروض المراقب يتحلى بصفات طولة بال ويحط في باله ان المعلمة اللي تمتحن مب حاطتنها فقفص اتهام... هي مجرد انسانه متوتره في لحظة امتحان وتبا تشتكي لكن مب عارفه لمنو... فتختار اقرب شخص وهو المراقب
المراقب فهالحالة لازم يمتص غضب الممتحن قد مايقدر ويهدي باله ويطمنه ... مب انه يرادده بالكلام ويخلي المسألة تتأزم...
من جهة ثانية وبصراحه مطلقة بعض المدرسات المفروض يتحلون ببعض الاسلوب والادب في التعامل مع المراقبين ويحطون فبالهم ان نحن (مانشتغل عندهم) وان نحن ماسرنا نراقب الا عشان نساعدهم قد مانقدر بالسلطات المفوضة لنا ونسهل عليهم الامتحان...
لكن شو بنقول الله كريم... في الامتحان يكرم المرء او يهان...
من جهة ثانيه وصلتنا شكاوي من معظم المدرسات بحجة انهن مب متخصصات باللغة العربية والمفروض مايمتحنونهن هالامتحان..
بصراحه انا اعارض هالشي...
مب عشانهن ولا عشانا... لكن عشان عيالنا اللي صدق ارتباطهم باللغة صاير ركيك وضعيف
تخيلوا ان ولد اختي... توه ابتدائي... ابلته العربي كاتبه له جمله في الكتاب والجملة تحتوي على كلمة (لكن)...
تخيلوا كيف كاتبتنها؟... كاتبتنها ( لا كن)..
اختي تعجبت ان ابلة العربي جي تكتب فمابالكم بباقي الابلات؟؟؟؟
قامت كتبت لها ورقه وقالت لها (انتِ استاذة اللغة العربية وليست هذه هي الطريقة التي تكتب بها "لكن" )
عل وعسى تحس وتاخذ الموضوع بجدية اكبر...
الامتحان كان هذا هدفه الاول والاخير... تعزيز اللغة وتحسينها عند معلمات المدارس عشان هالشي ينتقل تلقائيا لعيالنا...
والا شو رايكم؟؟؟
0 التعليقات:
إرسال تعليق