مراحب..
كان عندي مقابلة لوظيفة اخرى امس...
المسمى الوظيفي افضل.. مثل ماتقولي اختي.. وبكون امارس الشي اللي احبه بشكل يومي وهو "التصميم"...
لكن سبحان الله... ياني نفور غريب من كل شي هناك... ابتداءا من المديرة وانتهاءا بالمكتب الصغير اللي يقولون انه بيخصصونه لي...
وانا في خاطري "وععع" ... مع انه معقول بس مثل ماقلت ياني نفور غريب من كل شي...
ماقدرت اتقبل فكرة اني اترك المكان اللي انا فيه والناس اللي معايه واروح هالمكان بس عشان المسمى افضل والشغل مختلف..!!!
خلصت المقابلة ورجعت دوامي وانا قلبي منقبض وافكر وافكر وخايفه لا اكون قاعده افوت فرصه من ايدي....
ويوم دخلت مكان شغلي الحالي ومكتبي حسيت براحه نفسية مابعدها راحه... وفي خاطري اقول ..هيه..هذا مكاني..احساسي جي يقول...
ساعتها فعلا استقريت على قرار وقررت ارفض الاوفر اليديد..
صحيح فيه اشياء وايد مهمة في الوظيفة مثل المسمى والراتب والمكان والمميزات والخ....
بس كله كوم وراحتك النفسية كوم ثاني..
وانا هني ارتحت لابعد حد... وبعدني ماوصلت لمرحله اني ممكن امل من شغلي وادور على وظيفه ثانيه..
اسأل الله التوفيق لي ولكم وان شاء الله ماكون غلطانه برفضي للاوفر اليديد..!! خخخخخخخ
وصباح الخير
3 التعليقات:
الله يوفجج أختييه ،،
انا برايي أهم شي الرااحه في الشغل ..
:)
صلي استخارة والله بيسر اللي فيه الخير ...
تقبلي مروري
و دمتِ بود ..
السلام عليكم ورحمة الله وبركاته ..
مادري شو سبب النفور اللي حصل لج بيوم المقابلة بس احس ..
هالنفور يمكن لأنج تعودتِ عالدوام الجديم والناس اللي هناك .. ويمكن لأن التغيير دائماً يكون صعب للإنسان ..
يقولون المفروض ما نحكم على الناس من أول نظرة .. ومن كلامج حسيت إنج حكمتِ عليهم ( وعدميتهم) XD من أول نظرة ×_×
قبل هالتدوينة كنتِ تسألين عن كيف الواحد ينظم وقته بين الهواية والشغل .. والحلول تعرفينه بعد ما سألتِ قريباتج وربيعاتج ..
واليوم سبحان الله أشوف فرصة لممارسة الهواية + يكون عمل نفس الوقت .. منو ما يتمنى هالشي ؟ وظيفته تكون هوايته .. والله أحلى كلام ^_^
هذا غير المميزات الثانية ..
وطبعاً أنا ما أقول نشل الراحة النفسية من قاموسنا .. فهو أساس كل نجاح بعد توفيق الله ..
هممم ..
وبما إن المقابلة انتهت خلاص.. صلي استخارة .. وادعي الله واللي فيه الخير الله بيسره وبيجدمه لج ..
واتريي ردهم .. وتقدرين تسألين أي وحدة تداوم هناك .. كيف شغلهم ؟ وهل هي مرتاحة ولا ؟ ومن هالقبيل ...
هممم ..
أدري وايد تفلسفت .. بس حبيت أقول ..
أن الفرص مب كل مرة تيي للإنسان .. والإنسان الناجح هو اللي يستغل الفرص من أول مرة ..
الاستخارة فالاستخارة .. والدعاء الدعاء ..
والله ييسر لنا ولكم وللجميع .. والسموحة عالإطالة ..
^^"
هلا العيناوية :) ..
والله أنا أشوف لو محصلة مكان براتب أفضل ومزايا أفضل أعتقد يحتاج إنج تفكرين بالموضوع بطريقة أخرى، وعن المقابلة والمكان ترا كل شي بعدين يتغير، ما تعرفين
الله يوفقج إن شاء الله
إرسال تعليق