-=¤§ Updates . X . Updates §¤=-

السلام عليكم ورحمة الله..

تولهت على المدونة ( ويه يصيح)!!

عندي شويه علوم ...وشويه خرابيط...قلت ايي هني اخربط فالمدونة ..

شو ورانا غير نستهبل..!

============

عدسة جديدة..!!

من كم اسبوع اشتريت عدسة مايكرو نيكور 105mm

بصراحه العدسة فنااانه ماشاء الله وحبيتها خصوصا لتصوير البورتريت...

هالأيام متى ما أحصل فرصة دخلت النت واتعلم شوية دروس فالتصوير

احاول أطور الهواية لموهبة لكن الوقت والفرص مب مساعدتني...

لكني بكثف الجهود لاني احب هالهواية وايد..

بعد اسبوعيين باذن الله بشتري هوم ستوديو.. شفته في المحلات الكبرى ودخل مزاجي..

====================

حيوانات أليفة جديدة..

خلني آخذكم في جوله تعريفية على حيوانات بيتنا...

من قبل كنتوا تعرفون رمانة ..

 صورتها عاليسار ===>

الله يرحمها كاسكوووتي الحبيبه ماتت :( وحزنت عليها بشكل..

المهم..

من بعدها خذنا...Sweety  the Queen ^_^

العمر التقريبي: سنة و 4 شهور

ومن بعدها يبنا Mylan... تذكرون يوم أقولكم عنه كيووت لكنه عديم الأخلاق؟

إبشروا...مازال كيوت وعديم الأخلاق...خخخخخخ

العمر التقريبي: 9 أشهر..

ياب أخوي عقبها قطو ثاني وسمووه Silver ..الخواف..

العمر التقريبي : 4 أشهر..

وعقب حزن دام أربع شهور...استسلمت واشتريت لي كاسكو ثاني..

وامي سمته  ZORO ومارمنا نقول لا خخخخخ

مبونها قالت "جواهر" << نسبة للمسلسل الي كانت اتابعه ..قلنالها لا يبوج ارحم زورو عن جواهر

العمر الفعلي: 4 شهور...سووو كيوووووووت ^_^

وطبعا التصوير كله بالعدسة اليديدة ماعدا صورة زورو الأخيره بعدسة بنت اخوي المبدعة ماشاء الله... بعدسة مشابهة جدا لعدستي..

الفرق اني مازلت ما اتقنت استخدام العدسة لين احين...

اتعلم عليها متى ماسمحت لي الفرصة...

وهذي بعض الصور الأخرى....

==============================

بخصوص القصة اليديدة يا حبايب...مازال العمل عليها جارياً..

لكني ماحصل وقت وايد اقعد اكتب..

تصدقون اني من كم يووم رجعت أقرا قصة موعد مع السعادة مرة ثانية؟؟؟؟ واقراها منقوله في منتدى ليلاس

ووصلتني رسايل من الجماعه هناك واخص بالذكر العزيزة زاارااا و شبيهة القمر و alzaerah ماقصروا ارسلوا لي رسايل بس ماقدرت أرد عليها للأسف لان عدد مشاركاتي فالمنتدى ماوصل لـ 100...عشان جي بغيت اسلم عليكم هني واشكركم على رسايلكم الطيبة اللي أرسلتوها...

احس باحساس غريب يوم قريت القصة مرة ثانيه ماحس اني انا اللي كاتبتنها !! لووول

قربت اخلصها وكل ما اقرا فيها اكثر يرجع لي موود الكتابة... ان شاء الله اكتب اكثر واتفرغ اكثر للقصة اليديدة لاني متحمسه انزلها..

والحين موعد النوووم .. والا  بتصير حالي مثل حال هالبنية..

^_^

تصبحوون على خيرر...

-=¤§ غروب الشمس/ آخر أعمال التصوير §¤=-–

غروب الشمس لحظاتك تعيش بداخلي ذكره

تظل تعيش فى عمري مثل ظلى معي تنساق

شكيت جروح بغيابك ويصير الكون يا صغره

تاكد حس بشواقي فراقك بعثر الاوراق

سواد الليل يا طولك سكونك هيض العبره

دموع البعد خلني اعاني لوعتي بفراق

 

ارجع عشرة الماضي وتزيد بداخلي حسره

دريت انك رجاء روحي ومصيرك يا غروب اشراق

 

خيالك عايش ببالي وطيفك ساكن بفكره

عشقت بطبعك الدنيا ويزيدك مع حلاك اخلاق

 

علامك يا زمان دايم نصيبي فيك يا غبره

تعثر حضي العاثر عذابك يا زمن حراق

نسيت بحبك العالم لقيتك يا امل عمره

احبك اعشق ترابك احبك يا منى المشتاق

غروب الشمس لو غبتي شروقك موعدة بكره

جمالك لوحتن تبقى يحن لشوفهاالعشاق

-=¤§ in the mood §¤=-

good morning everyone...



my style of designing become old because lack of practice...
which is totally my fault...
any way.. guess I needed to design anything..even if it is "noobish"...
just to get in the mood of designing again...
I'm sick of designing for work and not for my self...


so...here is the result...

click on the photo to Enlarge

raykom !

قرية التراث في مدينة العين

مساء الخيرررررررررر

امس سرنا قرية التراث فالعين..لاول مرة اروح لها...ونفس الشي اهلي..
همم هي حلوه...كبداية... بس يغلب عليها طابع البيع والشراء..يعني محلات محلات محلات...
ماشفنا وايد من جوانب التراث اللي كنا نتأمل نشوفها...
بس كبداية حلوه وتمتعنا بزيارة قريتنا التراثية ^^..

here is some shots for you.... don't mind my camera..:( it was a little dark and with the zoom lens uphhh it was horrible for me to take any good shots !! :(

here is the robot guy..

funny for kids only !

then the best part for me....yuwaalaaah...heeee ^_^

the cars gallery

and some hand made stuff

now there was many shows...

i liked the fireworks guys..

they were brilliant

especially this guy...he was the most professional and talented one in the group

i liked his work very much..i got excited watching heheh

and some clowns

and there was this guy too..for me it was boring to watch

and guess what.!!

there was (ALSAAAMI) hehe

 

my niece have a better shot for him doing for us (7abetainnnnnnn V) lol ! such a crazy guy

 

 

and there was (SAIF AL'6AMI) as well..

استمتعنا بالرحلة... بس بصراحه كان الجو ثللللللللللللللللللللللج

متنا من البرد وهذا الشي الوحيد اللي خرب عليه ..مارمت اقعد كله اتنافض خخخ

-=¤§ كوليكشن ألعاب حلوة لعيونكم §¤=-

السلاااام عليكم







اليوم يبتلكم كوليكشن حلوة من الألعاب الحاسوبية، ناويه اخربكم، خخخخخ....


بس الصراحة ان هالالعاب ممتعة جدا وفريدة جدا من نوعها وايضا فيها استفادة وتطوير لمفرداتكم في اللغة الانجليزية، وفيها تطوير بعد للذكاء وقوة الملاحظة ...


يعني تتمتعون باستفادة....


الألعاب هاي ماتحتاج اتصال بالانترنيت... عشان جي حلوه تحطها في اللاب ووين ماتروح اذا مليت تقعد تتسلى حتى لو كنت في السيارة ورايح مشوار طويل... أول في الدوام وماشي شغل... او ماياك الرقاد... وعلى فكرة حلوه تشبكها بتلفزيون البلازما في البيت وتشارك اهلك وخصوصا العيال عندكم في البيت وكل حد مهما اختلف سنة في عملية التفتيش والملاحظة وحل الألغاز << مجربة هالحركة عندنا بالبيت خخخ..


مجموعة الألعاب اللي يبتها هي كلها من شركة Big Fish Games وهي شركة معروفة جدا في مجال الألعاب الحاسوبية ولكن.... كل ألعابهم تشتريها بفلوس.. لك مجال للتجربة... لكن ماتكون اللعبه كاملة او تكون مؤقتة لك فقط...


بس انا من فترة طويله قدرت احصل الألعاب اللي اباها نسخة كاملة ومجانا، واحتفظت فيهم عندي، احين يمكن لو تدورونهن في المواقع ماتحصلونهن يعني الفرصة قليلة جدا انكم تحصلونهن عشان جي مابغيت اتعبكم ورفعت لكم الألعاب اللي عندي عشان تستمتعون فيهن وتنزلونهن بدون أي مشاكل... واخر فصل من موضوعي هذا بيكون يحتوي على كل وصلات التحميل مع الشرح..


مجموع الألعاب اللي يبتها هي 6 ألعاب متسلسلة وهي مجموعة mystery case files الشهيرة لشركة big fish games نفسها... المجموعة هاي الملقبة بـ (MCF) تعتبر الأشهر بين مجموعة الألعاب اللي نزلتها الشركة على الإطلاق...


تقدرون تبدون بأي وحدة تعجبكم لكني انصحكم تلعبونهن بالترتيب اللي انا لعبتهن فيه وشفته افضل شي لمسار القصة...


Huntsville


Prime suspect


Ravenhearst


Madame Fate


Return to Ravenhearst


Dire Grove


والحين خلوني ابدأ بالتقرير البسيط لكل لعبة...


--------------------------------


Mystery Case Files: Huntsville

اللعبة هاي الفكرة الأساسية فيها مثلها مثل غيرها من ألعاب المجموعة هاي وهي hidden objects ... يعني يطلعون لك صورة انته يوم تشوفها تحس انها عفسه ومتروسة أشياء صغيره ودقيقة مركبه بحيث تشكل منظر طبيعي للعين ...


وعلى اليمين بتحصل قائمة بالكلمات... مثلا يحطون لك apple اقعد دور التفاحة عاد في المنظر هذا والتفاصيل هاي كلها لين ماتحصلهن كلهن...

طبعا في وقت محسوب عليك... اللعبه عبارة عن فصول وكل فصل له وقت معين مثلا 30 دقيقة.. في ال30 دقيقة هاي لازم تخلص كل المشاهد وتدور الكلمات عشان توصل للمشهد الاخير اللي فيها حل لغز لهذا الفصل..ويوم تخلص منه تنتقل للفصل اللي بعده وهكذا لييييييين تخلص اللعبة ^_^


---------------------


Mystery Case Files: Prime Suspect

برايم سسبكت نفس الشي بعد تقعد تدور اشياء، لكن قصتها هي ان عندك مجموعة ملفات سرية للشرطة خاصة ببعض المتهمين، كل فصل خاص بمتهم معين، واخر الفصل تعرف هل المتهم هذا مذنب او بريء.

---------------------


Mystery Case Files: Ravenhearst

Ravenhearst هو بيت مسكون بروح وحده مقتولة اعتقد وتركت وراها مذكراتها، عاد انت كمحقق واعتمادا على المذكرات هاي بتقدر تحل لغز البيت المسكون هذا .

--------------------


Mystery Case Files: Madame Fate

مدام فيت لعبة ممتعة جدا والألغاز اللي فيها ممتعة للحل والتفكير اكثر من سابقاتها، الشركة هني بدأت تطور سلسلة الألعاب هاي وهالشي ملحوظ في مدام فيت...


مدام فيت تدور حول المحقق هذا اللي يزور السيرك او الملاهي.. ويروح عند العرافة هاي، اللي تنبأت لنفسها انها بتموت الساعة 12 فليل، وشكت بكل اللي يشتغلون معاها في السيرك من مهرجين وسحرة وغيرهم....


واستغلت وجودك انت (المحقق) عشان تنقذها من كل اللي هي شاكه فيهم... الجماعة هذيلا كل واحد منهم يشكل فصل بحد ذاته..

السبب في اني طلبت منكم تلعبون مجموعة الألعاب هاي بالترتيب هذا كان بسبب اصدار مدام فيت، وهو انك بعد ما تنتهي من اللعبة وتخلصها، في المشهد الأخير يطلبون منك عن طريق التيلفون انك ترجع للبيت المسكون ravenhearst وتحقق فيه..


وهني ايي دور إصدار Return to Ravenhearst


--------------------------


Mystery Case Files: Return to Ravenhearst

ابتداءً من هالإصدار تطورت اللعبة بشكل كبير، طريقة اللعب في الإصدار هذا تختلف بشكل مثير واكثر امتاعاً...


صارت كأنك تلعب أي إصدار من إصدارات resident evil وطبعا اظن كلنا نعرف ريزدنت ايفل (وهل يخفى القمر؟ احلا العاب البلاي ستيشن)...


على العموم نرجع للعبتنا... طريقة اللعب هني فيها تحركات كثيره انته بنفسك تقعد تدور وتلف حوالي البيت وتجمع مفاتيح وتفتح ابواب وتحل ألغاز كثيرة .. وتروح وترجع على المكان الواحد مية الف مرة احيانا يتجدد فيه شي واحيانا لا... وتطلع لك أرواح الميتين بين فترة وفترة في هالاصدار...

لعبة ممتعة جدااااااااااااااااااااا...


---------------------------------


Mystery Case Files: Dire Grove

طريقتها باللعب مثل سابقتها، وهي طريقة ممتعة جدا بنظري، القصة هني تتكلم عن اربع شباب وبنات من خريجين الجامعة يحققون او يتبعون احداث قصة تعتبر من القصص الخيالية لكن القروب هذا مصدق القصة وراح يحقق في موضوعها في المكان اللي صارت فيه وهو فندق dire grove


اللعبة هاي بتحسسك بالبرد، برد برد وثلج كل مكااااااااااان وين ماتروح تحس المكان مثلج وبارد ...خخخ


طبعا القروب هذا يصيبه الحظ السيئ للمكان، ويتفرقون عن بعض وتصيبهم امور مأساوية واحد ورا الثاني، و يتركون وراهم مجموعة أفلام مصورة لمأساتهم انته تحصلهن واحد ورا الثاني بشكل مب مرتب وتشوفهم في جهازك التابع للعبة، وفيها ألغاز وايد شي منها صعب جدا بالحل وشي سهل وبسيط،

انته كمحقق بتحصل الشباب هذيلا واحد ورا الثاني وكل واحد منهم يوم تحصله عنده لغز يتريا منك الحل...

اللعبة هاي فيها اشياء في اخرها بتحس انك يأست وماعرفت تكمل وبتحس انك ظايع وبتقعد تروح وترجع عالأماكن نفسها بدون ماتلاحظ أي تطور صاير، انا صارت لي بصراحه، مع اني اعتبر نفسي شاطره بهالالعاب وحل الألغاز الحمد لله، لكني واجهت بعض الصعوبة ... اللعبة هاي صعبة مب بالسلاسة اللي تتصورونها...


وبعتر فاني لجأت للانترنيت شوي عشان اعرف الخطوة اليايه.. غشيت مرتين بس ..مب وايد خخخخ..


--------------------------


والحين نوصل لقسم التحميل للألعاب هاي..


Huntsville + prime suspect+ ravenhearst+ Madame fate


بتحصلونهن في هالوصلة


MCF 4 in 1


.. مع بعض في برنامج تثبيت واحد (لكن) .. اصدار مادام فيت هني فيه خلل بسيط لكن الخلل هذا مايخليك تقدر تكمل اللعبة...عشان جي رجاءا اتبعوا الآتي وقت التنزيل.... شلوا الصح عن مادام فيت وكملوا تثبيت الباقي...

جذي بتصير عندك 3 ألعاب... اما مدام فيت...بتحصلونها في تثبيت منفصل في هذي الوصلة


Madame Fate






تحميل return to ravenhearst


لكن الفولدر اللي بتحصلونه هني هو فولدر مضغوط للعبة ، وهي لعبة portable يعني متنقلة ماتحتاج لأي تثبيت، اللهم فك الضغط عن الفولدر، افتح الفولدر، واضغط على اللعبة وانجووووووي..!!! ^_^






تحميل Dire Grove
 اللعبة هاي collectors addition فقط للعلم..وهي بمميزات اكثر وافضل من العادية...


-----------------------


وبجذي خلصت انا موضوع الخراب..اوه اقصد موضوع الألعاب الممتعة جدا، واتمنى لكم قضاء وقت ممتع مع هذه المجموعة المميزة.


إلى اللقاء في تقارير أخرى...

-=¤§ كتب × كتب §¤=-

السسسسسسسلام عليكم ورحمة الله وبركاته


طبعا خرطي قلت باجر بحط موضوع ولا حطيت صارلي اسبوع يمكن خخخ..العيازه بنت حرام كانن الكتب متوزعات بين حجرتي والمكتب وكل يوم اقول بييبهن عشان اصورهن وانسى...
اليوم عاد تذكرت...

تخيلوا اني شاله كيمرتي للمكتب؟ وشالتنها مب مجرجه بعد شاله الجرج وحالتي حاله...
المهم..

الفترة الاخيره حطيت ايدي على كم كتاب... كلهن حلوات..

الكتاب الأول: لعبة المرأة ، رجل
للكاتبة سارة العليوي

خبرتكم انا عن الكتاب من القبل... لكني انقطعت عن قراءته ورديت اقراه من فترة، وخلصت القصة، هي حلوه بصراحة ومستواها معقول كإنتاج كتاب ثاني للكاتبة... هي لها قصة سابقة اسمها "سعوديات" ..ماقريته لين احين بصراحة. المهم القصة حلوه ولو ان فيها بعض الشخصيات اللي ترررررفع الضغط... وفيها بعض الاحداث والاشياء اللي احس انها (من وجهة نظر إماراتية) مستحيلة.. لكنها يمكن تصير في السعودية الله اعلم ..!!..لكن القصة بشكل عام..تستحق القراءة.. ونقطة على السطر ^_^

الكتاب الثاني: فارس بحصان رمادي (مقالات عامية ساخرة) للكاتبة صديقة الطفولة ( لطيفة الحاج)

طبعا من وعيت انا على هواية الكتابة عندي ايام الاعدادي وانا اعرف ان لطيفة بعد عندها نفس الهواية... كانت تكتب خواطر ومازالت لكنها من كم سنة دخلت مجال القصص القصيرة والمقالات ثم المقالات الساخرة، وبسبب معرفتي للطيفة وشخصيتها وكيف تفكيرها اقدر اقول ان المقالات الساخرة مجالها فعلاً... محد يطنز كثر لطوف! اذكر انها تجتلنا من الظحك يوم بتقول سالفة، اسلوبها ساخر وفظيع خخخخ...ماشاء الله عليها..سبقتني وانتجت كتابها الأول وماقصرت اهدتني نسخة موقعة..كان خاطري اصور خطها بعد بس نسيييت خخخ...

اللي يميز الكتاب ومايحتويه من مقالات ساخرة انك تحس بالمقالات قاعدة تلمس جوانب مختلفه من جوانب حياتك، تحس انك مريت بهالموقف، او فكرت بهالفكرة، او عارف بالضبط شو اللي قاعدة تقصده لطيفة ومب بعيد عليك، إلى جانب فكاهيتها وخفتها يعني من تبدا تقرا مقالة ماتدريبها الا وهي خلصت وتمتعت فيها، وماتقدر توقف تقعد تكمل مقالة ورا مقالة ورا مقالة.

الكتاب ممتع جدا بصراحة ومسلي واعتبره له مكانة مميزة في مكتبتي، حتى يوم عطيته اختي تقراه وشلته الشارجة معاها تميت الا افكر بالكتاب ومتى بترجعه وهل هو سليم وماخيسووه جاهي والا صالونه والا كافي !!! خخخخخ وماصدقته يوم ردلي سالم غانم..

ومادري هل الكتاب في الاسواق او لا... يمكن لطيفة تقدر تفيدنا بهالموضوع !!

في نهاية الموضوع هذا بهديكم مقالة من مقالاتها الموجودة في الكتاب... مقالة حبيتها وظحكت عليها صدق...

ملاحظة: مدونة لطيفة الحاج موجودة في قائمة مشاهداتي على اليسار... مدونة جميلة وممتعة.

الكتاب الثالث: الســـر... Secret

للكاتبة روندا بايرن..

صدعووووووونا بالكتاب هذا فالدوام، الكل قابضنة في ايده وكل حد خبرني عنه، قلت يا جماعة كيف يطوفني كتاب فنان جي مثل مايقولون، ربعت واشتريته، واقرا واقرا فيه،،،

اخرتها خلاصته والفكرة العامة الموجودة فيه هي أصلا موجودة في دينا الإسلامي، يعني لو الكاتبة أسلمت جان عرفت ان فكرتها مب يديدة وان السر اللي ترمس عنه وتبا تكشفه هو أصلا معظم المسلمين يعرفونه لكن للأسف مايطبقونه وايد، الفكرة العامة هي:

"تفاءلوا بالخير ، تجدوه"

السر على قولة الكاتبة هي انك تفكر بالشي اللي تباه، بشكل ايجابي، وتقنع نفسك ان هالشي اللي تباه بيوصل لك لا محالة، لان (الكون بكل طاقاته بيجلبونه لك) لانك انته كإنسان تعتبر بطاقتك أكبر عنصر جذب، وتبدا تتصرف على أساس انك حصلت الشي اللي تباه فعلاً وبتشوف ان الشي هذا بيوصل لك اكيد.

اما اذا قعدت تفكر بالأشياء اللي بتخلي هالشي مايوصلك فهذا تفكير سلبي بالتالي (الكون) بطاقته بيخلي هالشي اللي تباه ماييك فعلا، وان الأشياء اللي قاعد تفكر هي اللي بتصير، حتى لو انت ماتباها تصير، السالفه ومافيها ان الشي اللي تفكر فيه سواء ايجابي او سلبي هو اللي بيحققه لك  (الكون)، بالتالي اجذب الافكار الايجابية ولا تجذب الأفكار السلبية.

خلاصة الحديث .. يا جماعة ( تفاءلوا بالخير تجدوووووه)... بإذن الله الكريم. على العموم لمحبي الفلسفة ، الكتاب نايس...

الكتاب الرابع: خطأ في حياتي (مجموعة قصصية)

للكاتبة قماشة العليان

لم أقرأه بعد، ولكني بدأت فيه، محد ذكر لي هالكتاب من قبل ولا حد مدحه او ذمه لي، شفته على رف المكتبه، واسم الكاتبه يدق في راسي اجراس مادري ليش، قمت خذته من زمان وتوني بس بديت اقراه، الكتااب يحتوي على 18 قصة قصيرة تتكون كل قصة من صفحتين بالكثير..

شكله حلو، بكمل قراءته وبخبركم برأيي بعدين...

أما الحين بخليكم مع مقالة ساخرة من مقالات لطيفة الحاج/ والفلم اللي تقصده لطيفة في هالمقالة هو فلم Vivah وهو فلم جميل جدا(<< غياظ للطوف خخخخ):

عنوان المقالة: تمنيت أكون هندية في فلم

" من زمان ماشفت فلم هندي ودخل مخي واندمجت في أحداثه وتابعته بكل شغف واستمتاع، وقد منتني وحدة من صديقاتي بفلم واكدت إن لو شفته بحب الأفلام الهندية والهنود وحياة الهنود وبتمنى أكون هندية بعد، وظليت شهور انتظر صديقتي تطرش لي الفلم وانا اتخيل عمري عايشة في احداث الفلم وكاشخة بالساري والحيول " الأساور" البلاستيكية الملونة، وتتوسط جبهتي نقطة حمرا.

وحصلت اخيرا على الفلم، واستانست ع الاحداث والقصة، وكانت صديقتي على حق لني الصراحة طول الفلم تمنيت اكون هندية. المنطقة اللي مصورين فيها الفلم حلوه والناس طيبين وقلوبهم على بعض وحتى الطبقة الغنية في الفلم كانوا متواضعين وطيبين، واحلى شي يوم كانوا يجهزون للعرس، وتقاليد الزواج الهندي والحنا والورد، كل شي كان جميل ومرتب لحد ماطلعت العقدة في الفلم يوم شبت الحريجة في بيت العروس واحترقت زهبتها وتم البيت يطيح على روسهم والناس يالسة تطالع الألعاب النارية، يوم انتبهوا ان في اشياء قاعدة تطيح وفي دخنة غير طبيعية في الاجواء اخلوا البيت وبقت قريبة البطلة داخل بعد ما اختنقت بالدخان واغمى عليها، هنيه قررت البطلة تنقذها غير آبهة بالنيرات اللي قضت على الأخضر واليابس، ودخلت وانقذت قريبتها وضحت بنفسها واحترق جسمها كله.

لحظة استوعبت اللي صاير وان الكاتب والمخرج الهنود ما قدروا يخلون الفلم يمر على خير صرخت غضبا وندمت على الساعتين اللي قضيتهن وانا اتخيل عمري هندية ومستانسة على الفلم اللي اخترب في اخر ربع ساعة. وكرهت الهنود، وطريقة الهنود في صنع العقدة والحبكة في الأفلام اللي ع بالهم قاعدين يخلونها اكثر تشويقا في حين انهم يطينونها بستين طينة.

اللي يشفع لهم - عندي - ان البطل تمسك بموقفه واصر على الزواج بالبطلة حتى وهي محترقة وماخلا حروقها تحول بينه وبين حبه وهذا ليس بالامر الغريب على البطل الهندي، وصح اني في كل الحالات تعاطفت معاهم وذرفت من الدموع ما ذرفت لكن عتبي على الكاتب والمخرج كان لا يضاهيه عتب.

بس هذا امر طبيعي لاني والله اعلى واعلم اعتقد ان بوليوود تفرض على منتجي الافلام ان تكون هناك عقدة "منقعة" لان كل ماكان الفلم اقرب الى المستحيل كل ماكان يعكس صورة الانتاج البوليوودي الاكثر نجاحاً."