==========مبروك عليكم الشهر==========
السلاااااااام عليكم ورحمة الله وبركاته
كيف الحال حبايب عساكم بخير؟
ادري كل مره اقول غبار بس صدق هالمره غبار لول...وايد ابطيت وتاخرت عالمدونة بس فعلا كنت وااااااااااااااااااااايد مشغوله ومضغوطه هالفترة في الدوام حتى كنت اييب شغلي البيت...
والحمد لله حصلنا فجـّـه وتفيجنا شوي وخف الضغط والزحمه....
هي صح نسيت....مبروووووووووووووك عليكم الشهررررر....عسا ربي يعوده علينا وعليكم الخيييييييير يارب.... صوموووا عدل...هالله هالله..
بصراحه رمضان هالمرة شوي بارد احسه..مادري كيف...يمكن لاني مب حاستبه وايد بسبب اني اداوم.
السنتين اللي طافن رمضت فيهن فالبيت وماشي شغل فاظيه.... وقبل كنا دراسه بس بعد غير الدراسه عن الدوام ...!!
حظهم عيال المدارس ماشي دوامااااااااااات.....
==========فظيحة==========
طبعا مثل كل يوم ....يالسه اتابع مسلسلاتي لهالشهر....
انا كل شهر اختار مسلسل واحد بس اتابعه عشان اتفرغ لباقي نشاطات رمضان....
لكن هالشهر خربت لاني بصراحه مستقطعه عالمسلسلات صارلي فترة طوييييييييييييييييييييله ماتابعت مسلسل خليجي حلو!!!!
قمت خبطت خبطه وتابعت ثلاثة...(دروب المطايا/ قلوب للايجار/ ام البنات)
المهم ذاك اليوم في امان الله يالسه اتابع في غرفتي دروب المطايا.على قناتنا الاماراتية العزيزة جدا "أبوظبي"... وطبعا هو عقب دروب المطايا ايي ام البنات على طول....
الا واشوفلكم ذاك الشي عالشاشه.....اول شي خطفتها...شفتهم اخفوها بسرعه الكلمه اللي انكتبت...قلت لاااااااء ياحليلهم..اكيد غلطه مطبعية واحين بيصلحونها وبيطلعون الصحيحة....
واشوفهم لازقينها مره ثانيه عالشاشه....وثالثه...ورابعه...لين نقعت جبدي وقلت الا اصوركم يالخياس ياللي فظحتونا عند خلق الله!!!!!
كيف كاتبين [التالي>> ام البـــانــــات]....!!!!!!!!!!!!!
واخزياااااااااااااااه واخزياااااااه !!!... ام البانات ! على قناة بوظبي !...تابعونا
اي تابعونا انتوا خليتوا فيها متابعه !!!...احين نحنا شادين الظهر ومعتزين بالقناة واخرتها تنقعون هالتنقيعه الهندية المتروسة دهن تاتا !
يالله بالستر...
خشيت الصورة قلت بظحك بها خواتي بس...ومابفضح قناتنا العزيزة...
لكن سواد الويه استمر ليوم ثاني وثالث ورابع ومازالوا لين اليوم يكتبونها ...التالي... ام الباااانااااااااات..
اقول...مايوظفوني عندهم ادقق لغة؟ ترا قسم بالله فشله !========== لعبة المرأة...رجل!========== 
كتاب جديد... للكاتبة سارة العليوي....
تذكرون الكتاب العبيط اللي كنت اقراه..صاحبة السمو الملكي...
شكلي بفرة فالزبالة
كتاب قرررررف لي احين ماقدرت اكمله بسبب برودة الاحداث... مع اني وصلت وايد فيها بس مول ماحصلت فيها شي يشد بصراحه خيبت ظني الرواية ....
المهم سرت وقلت خلنا نرجع للخليجييين ونشوف المواهب اليديده...وقبضت هالكتاب وشدني...
بصراحه القصة تشدك شد من اول صفحه ...بعدني ماخلصتها...بس اتوقع ان القصة تستحق القراءة وبجدارة...
مسك.. وليل دي....سمعوا مني واشتروا الرواية تراها حلوه واحس انها بتعجبكم خخخخخخخخ...
وهذا هو النص المكتوب على غلاف الرواية الخلفي...
(( استيقظ نايف من نومه على قبله تلاقها من مشاعل، أيقظته بها بعد نوم عميق وطويل، فقد قاربت الساعة إلى تمام السادسة مساءً، تمايلت أمامه بدلع صارخ يشف قميصها الوردي عن خبايا جسدها الحنطي، تتحدث إليه بهمس جذاب، تحثه على ضرورة الاستيقاظ والتهيؤ لقضاء ما تبقى من اليوم في المرح والذهاب إلى مكان للسهر والاستمتاع، فنايف لم يبارح فراشه منذ زواجه بها، فقد أمضى أيامه الثلاث الأولى معها بين حيطان الجناح الفاخر، يقضي معها أسعد لحظات حياته، يمضي اليوم يستمع لصوتها وهي تغرد على مسامعه تارة وتحدثه بطريقة تذيبة كما قطعة السكر في كوب الشاي، لمس معها متعة لم يعشها من قبل، أرضت بدورها كل طموحاته ورغباته، أغوته بأنوثتها بالرغم من افتقارها لذات الجمال الطاغي الذي تمتلكه زوجته الأولى ابنة عمه، لم يكن هذا الأمر بمثابة حاجزاً أو عائقاً أو ذو سبب وجيه سجعله يضعها في مقارنة مع هند فقد كانت المقارنة ظالمة بين الاثنتين في الجمال وتقتصر فقط على متعته ولذته، وهنا ترجح كفة مشاعل بلا منازع))
اللي قاري الروية لا يخرب علي النهاية بليز لوووول
========== لـمحبي ون بيس ============
ابشركم... نجحت والحمد لله بتخطي اول عشر حلقات من هالمسلسل بعد ماحاولت مرات عدة اني اتابعه وماقدرت اتحمل...
لكني تحملت وبديت اندمج خخخخخخخخخخخ وشكلي بكم متابعة لون بيس في اوقات فراغي القليلة...
قالولي بندمج "من الخاطر" بعد كم من حلقة يايات...
بنشوووووووف !! :P
========== تقبل الله صيامكم وقيامكم ==========
