-=¤§ Things Are Better This Way §¤=-–

مراحب..

كان عندي مقابلة لوظيفة اخرى امس...
المسمى الوظيفي افضل.. مثل ماتقولي اختي.. وبكون امارس الشي اللي احبه بشكل يومي وهو "التصميم"...
لكن سبحان الله... ياني نفور غريب من كل شي هناك... ابتداءا من المديرة وانتهاءا بالمكتب الصغير اللي يقولون انه بيخصصونه لي...
وانا في خاطري "وععع" ... مع انه معقول بس مثل ماقلت ياني نفور غريب من كل شي...
ماقدرت اتقبل فكرة اني اترك المكان اللي انا فيه والناس اللي معايه واروح هالمكان بس عشان المسمى افضل والشغل مختلف..!!!
خلصت المقابلة ورجعت دوامي وانا قلبي منقبض وافكر وافكر وخايفه لا اكون قاعده افوت فرصه من ايدي....
ويوم دخلت مكان شغلي الحالي ومكتبي حسيت براحه نفسية مابعدها راحه... وفي خاطري اقول ..هيه..هذا مكاني..احساسي جي يقول...
ساعتها فعلا استقريت على قرار وقررت ارفض الاوفر اليديد..

صحيح فيه اشياء وايد مهمة في الوظيفة مثل المسمى والراتب والمكان والمميزات والخ....
بس كله كوم وراحتك النفسية كوم ثاني..
وانا هني ارتحت لابعد حد... وبعدني ماوصلت لمرحله اني ممكن امل من شغلي وادور على وظيفه ثانيه..

اسأل الله التوفيق لي ولكم وان شاء الله ماكون غلطانه برفضي للاوفر اليديد..!! خخخخخخخ

وصباح الخير

-=¤§ Special Gift from SomeOne Special §¤=-

السلام عليكم

كيف الحال؟ واااي غبار صراحه عالمدونة من زمان مادخلت اجدد شي

كنت وااايد مشغوله مع نظام حياتي اليديد اللي تغير وايد مع بداية الوظيفة..

سؤال للموظفات...

كيف قدرتوا توفقون بين الوظيفه وجدولها والتزاماتها..وبين هواياتكم اللي تحبون تمارسونها وروتينكم الاولي قبل الوظيفه؟

انا بصراحه معتفس مزاجي بسبب هذا الموضوع..

سالت اكثر من شخص... كيف اقدر انسق بين دوامي واستمر في ممارسة الاشياء اللي احبها وكنت امارسها بشكل يومي قبل حصولي على الوظيفه؟

ياريت لو ساعات اليوم أطول.... ياريت لو فيني طاقة غير محدوده بحيث اني اول مارجع من الدوام ما انام وما ارتاح على طول اروح امارس هواياتي ومع ذلك احصل وقت اقعد مع اهلي واقعد مع نفسي شوي...

ياريت وياريت...

جواب اغلب الناس اللي سالتهم كان.... "تحتاجين وقت لين تتعودين على روتين الوظيفه..وبعدها تقدرين تنسقين وتظيفين ممارسة هواياتج بما يتناسب مع وظيفتج لان هي الأهم حاليا"...

بس انا مافيني صبر...

تولهت عالتصميم..تولهت عالقراية.تولهت عالأنيم...تولهت عالافلام..تولهت عالمسلسلات اليابانية والكورية..تولهت على ألعابي الأونلاين...تولهت عالتصوير..تولهت على متابعة المواقع..تولهت على تعلم البرامج اليديده..تولهت على ربعي والمسن والسوالف...واهم شي تولهت عالكتابة :(... مسار تطور قصتي اليديده صاير بطيء ومب بالسرعة الكافية ... اذا تميت جي عيل متى ببدا بالنشر؟؟؟؟

الله يعين... ان شاء الله اقدر احصل جدول مناسب في اقرب فرصه..احس ان اموري كلها متخربطه وماعندي جدول منتظم في اي شي حتى في أبسط الأمور وهو أكلي...!

زدت كيلو !!! <<< مصيبه .. احين انا ماصدقت أوصل هالوزن، آخر شي اقوم ازيد كيلو !!!!...

بصراحه لازم احصل حل سريع بديت اعصب خخخخخخ..

على العموم....

اول ايام دوامي تلقيت زياره من شخص عزيز جدا... مع هدية سبيشال صارت من مقتنياتي العزيزة !..

for that special person...thank you for being so kind to me

and i loved the gift.